Lo implementa corporate governance code pronto

ORANJESTAD – Den cuadro di vision tocante integridad, gobierno lo dividi su plannan relaciona cu esaki den tres parti:

  • Bureau Integriteit (Oficina di Integridad); E oficina aki lo conscientisa riba loke por y kico no por segun reglanan di integridad tanto den sector publico como den sector priva. Tambe e bureau aki lo ta encarga pa ricibi e ‘meldingen’, reportahenan di cosnan cu ta bay bon pa loke ta integridad of kiebronan di integridad.
  • Integriteitskamer (Kamber di Integridad); E oficina aki lo ta encarga pa scrutina desicionnan grandi di Gobierno den entro otro destahonan publico.
  • Corporate Governance Code (Codigo di gobierno corporativo); Esaki ta reglanan di integridad cu ta aplicabel riba tanto sector publico como sector priva, refiriendo aki na companianan estatal di Gobierno y sector priva.

Banco Central ta esun cu e prepara e ley aki pa gobierno y recientemente a haci un presentacion na conseho di Minister. Durante e presentacion Banco Central a splica e aspectonan di e ley. Banco Central a indica tambe cu mester bin cu un comision pa monitoria consistiendo di Secretario di Algemene Rekenkamer, Director di Centrale Accountantsdienst Aruba y di diferente persona di peso den nos comunidad. E comision aki lo mester duna Gobierno conseho sea e ta ‘gevraagd’ (pidi) of ‘ongevraagd’ (no pidi). Dus si Gobierno pidi conseho, e lo haya conseho y aunke cu Gobierno no pidi conseho pero e comision ta considera cu Gobierno mester haya conseho, nan lo duna e conseho tambe. Lo publica tur conseho duna. Esaki lo trece grado di transparencia den nos comunidad na unda ta haci conoci tambe con lo dirigi e companianan estatal.

Prome Minister ta sumamente contento cu Banco Central a entrega Gobierno e ley aki y awo Gobierno lo cuminsa prepara e plan di implementacion. Tin hopi trabou ainda cu mester haci prome cu tur hende ta riba mesun linea. Lo cuminsa pa haci un inventarisacion pa analisa con grandi e gap ta entre e situacion actual y e situacion cu e ley aki ta describi. Despues lo traha un plan pa cada gap den compania y institutonan di Gobierno pa hunto introduci y implementa e ley aki na aña 2021. Pa companianan estatal, lo no warda asina tanto tempo pa cuminsa practica esaki, sino lo cuminsa haci esaki via un maneho adelanta.

“Mi ta sumamente contento y satisfecho cu e paso grandi aki pasobra poco poco pero sigur mi ta mira cu e deseo cu nos comunidad tin pa cu integridad ta wordo realisa”, Prome Minister Evelyn Wever-Croes a expresa.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options