Lechi di Pecho y Coronavirus (COVID-19)

ORANJESTAD -  Departamento di Salud Publico y Pro Lechi Mama ta informa si bo ta mama di un baby y bo ta criando bo yiu na pecho, ta masha consehabel pa aplica ‘social distancing’ y no sali cu bo yiu for di cas of ricibi bishita na cas pa asina baha e riesgo di wordo infecta cu e Coronavirus.

Pero, si un mama ta cria su baby na pecho y ta contrae Corona virus (Covid-19) NO ta necesario pa separa e baby di un mama contagia. Ta hustamente consehabel pa e sigui duna su baby pecho. Di con? Ta comproba cu, na momento cu un mama tin un infeccion, e ta produci anticuerpo pa combati e infecion aki. Y e mama ta transmiti e anticuerponan aki na su baby via di su lechi. Pesey NO tin motibo pa stop di duna lechi di pecho na momento di un sospecho of diagnostico di e Corona virus. Al contrario: door di sigui duna bo baby pecho, bo ta yud’e subi su defensa contra e virus aki. E lech’i pecho awo mas cu nunca por yuda e baby cu e no ta haya e virus mes. Y si e haya e Corona virus mes, e ta hay’e mas leve y cu e ta recupera mas lihe. Pa e mama contagia nos tin e siguiente consehonan. Prome cu cria bo yiu na pecho:

  • Laba bo mannan bon;
  • tapa bo boca y nanishi ora bo ta dunando bo yiu pecho;
  • duna bo yiu pecho “on demand” o sea, frecuentemente;
  • Sigui e consehonan normal: laba man frecuentemente cu awa y habon (minimal 20 seconde), desinfecta man frecuentemente cu alcohol (min. 60%), tene tur superficie desinfecta, tosa y niester den elleboog of uza un kleenex cu ta tira afo di biaha sigui cu laba man;
  • Bebe hopi awa, descansa suficiente;
  • Sigui duna pecho manera Organisacion Mundial di Salud y UNICEF ta urgi;
  • Si bo ta sintibo hopi malo, bo por scoge pa pomp bo lechi y laga un otro persona encarga pa duna bo yiu bo lechi;
  • Si e mama mester wordo hospitalisa, ta keda mesun importante pa e baby keda den cercania di su mama y cu e mama ta keda duna su yiu lechi di pecho.
  • Pues, un bes mas, lech’i pecho ta sigui ta e miho opcion. Ta sumamente importante pa haya ayudo di bo famia pa asina abo como mama por focus riba bo baby y e dunamento di lechi di pecho.

Lucha contra e transmision di Corona Virus, e ta cuminsa na ABO. Si bo tin sintoma di COVID-19 yama 280-0101 pa ricibi instruccion.

Lechi di pecho y coronavirus

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options