Isolacion of quarantaine. Kico ta e diferencia?

ORANJESTAD – Departamento di Salud ta splica diferencia entre Isolacion of quarantaine.

Isolacion ta ora un persona ta malo. E por wordo isola pa preveni cu e ta contagia otro personanan, cu e ta bin den contacto cu n’e.

Quarantaine
Ora un persona no ta malo, pero porta cu e por bay bira malo, e persona aki por wordo poni den quarantaine te ora cu ta sigur cu e persona aki no ta contagia y/of ta malo. Pa e COVID-19 e recomendacion di e temporada di quarantaine ta 14 dia.

Recomendacionnan pa isolacion y quarantaine pa COVID-19
Consehonan pa personanan cu y sin sintoma.
Abo ta isolando bo mes door di e risico halto di por tabata exponi na novel Coronavirus - COVID -19?

E accionnan aki lo yuda proteha otro hende paden y pafo di bo cas di contrae e virus. Kico kiermen isola bo mes?

  • Keda cas of den bo residencia temporal, no bay trabou, skol of area nan public;
  • Aleha bo mes, di otro hendenan cu ta biba cu bo den cas of residencia temporal;
  • Uza facilidadnan (baño, cushina) separa, si mester comparti nan mester desinfecta nan prome cu otro uza nan;
  • Haci uzo di sistema di entrega na cas/ homedelivery, pa cuminda, medicamento y/of otro tipo di productonan necesario;
  • No ricibi bishita na bo cas of residencia temporal;
  • Purba keda leu di bo mascotanan, si esei no ta posibel laba bo man prome y despues di mishi cu nan;

Preveni plama e infeccion

  • Laba bo mannan frecuentemente cu awa y habon of cu un desinfectante pa man a base di alcohol di mas cu 60%;
  • Tosa of nister den un napkin y benta esaki afo inmediatamente;
  • Haci uzo di articulonan di cas den forma separa manera serbete, paña di cama, copi, tayo entre otro.
  • Bisti un tapa boca ora bo ta rond di otronan solamente si bo haya instruccion di profesionalnan di salud pa haci esaki;
  • Laba bo mannan cu awa y habon cada biaha despues di uza baño;
  • Laba mannan cu awa y habon prome cu cushina of come;
  • Cuida bo salud y bienestar

Pa esnan cu tin sintomanan di infeccion:

  • Descansa suficiente te ora bo ta sinti miho;
  • Bebe suficiente liquido pa asina bo por orina regularmente;
  • Bebe Paracetamol manera bo a wordo indica pa disminui dolor y keintura

Pa tur persona cu ta den auto isolacion:

  • Mantene contacto cu bo amigonan y famia via telefoon, video of online;
  • Hiba bo hobby of interesnan personal cas pa por distrae durante di e temporada;
  • Haci ehercicio regularmente na bo cas mes, no bay gym.

Yama Call Center Coronavirus na 280-0101 pa instruccion si bo desaroya sintoma di tosamento of problema pa hala rosea despues di a regresa di biahe of tawata tin contacto cu un persona positivo pa COVID-19.

Pa e ultimo desaroyonan y informacion bishita website di Departamento di Salud Publico  www.arubacovid19.org

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options