Hulanda ta yuda Aruba cu 10.9 miyon florin pa crisis Venezuela

ORANJESTAD - Riba 6 di september 2019, parti mainta, Prome Minister Evelyn Wever-Croes a anuncia cu Hulanda y Aruba a yega na acuerdo pa yudansa relaciona cu e crisis cu Venezuela.

Hulanda lo duna e 10.9 miyon florin pa yuda  Gobierno di Aruba pa enfrenta e crisis. Na e mesun momento, a haci e anuncio aki na Hulanda tambe.

Na luna di mei cu a pasa, Hulanda a indica cu e ta dispuesto pa yuda Aruba y Corsou pa atende cu e crisis di Venezuela cu 23.8 miyon Euro cu ta alrededor di 55 miyon florin. Un gran parti di e 55 miyon florin Hulanda lo uza pa e mes yuda nos, y pa e otro parti Aruba y Corsou mester a entrega nan lista di plannan y proyectonan.

E 10.9 miyon florin aki ta bay pa fortifica Aruba como pais, den haci Aruba mas sigur p’asina atende cu e crisis miho posibel. E ta pa yuda Aruba pa controla nos fronteranan miho p’asina nos percura pa domina e crisis cu nos tin internamente.

Control riba lama y tera lo bira mas estricto p’asina evita importacion ilegal di sustancianan, arma como tambe di persona. E tema di mensenhandel y mensensmokkel (traficacion humano) ta un problema serio cu ta tumando luga demasiado hopi den nos region. Pa esaki lo inverti den ampliacion di Kustwacht, pa patruya nos awanan y asina evita importacion ilegal, y transporte ilegal di hende.

Tambe cu parti di e placa aki lo amplia e capacidad di detencion na unda esnan ilegal por keda mientras nan ta warda e fecha cu nan worde manda back nan pais. Esaki den e tempo aki ta hopi importante y necesario mirando e fluho di iligalidad na Aruba a aumenta. Ampliacion di e capacidad di detencion lo trece mas trankilidad.

Lo uza parti di e fondo aki tambe pa enseñansa temporal, pa muchanan cu ta bin for di Venezuela cu no por drenta nos scolnan, pa garantisa cu nan ta haya educacion durante e tempo cu nan ta na Aruba. Asina evita cu nan ta bira un peso pa comunidad y evita mas problema social.

Ta bon pa remarca si, cu e placa aki lo no ta disponibel pa crea vivienda of cubri otro gastonan di personanan cu ta bin haci peticion di asilo. Tampoco por uza e placa pa cubri gastonan di operacion di Gobierno. E placa aki ta bay pa fortifica Aruba como pais, den haci Aruba mas fuerte y mas sigur, y asina por atende cu e crisis miho posibel.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options