Gobernador a bishita Fundacion pa Hende Muhe den Dificultad

ORANJESTAD - Riba diaranson merdia 13 di mei 2020 Gobernador di Aruba, S.E. Alfonso Boekhoudt, a haci un bishita di trabou na Fundacion pa Hende Muhe den Dificultad (FHMD).

Gobernador durante bishita di trabou na Fundacion pa Hende Muhe den Dificultad E bishita a tuma luga den cuadro di e brote di Coronavirus (COVID-19). Meta di FHMD ta pa stop violencia domestico na Aruba. E trahadonan di FHMD ta brinda ayudo na e personanan cu a bira victima di violencia domestico. Gobernador Boekhoudt a combersa cu e boluntarionan, trahadonan y miembronan di directiva di FHMD, unda nan a informa Gobernador con nan ta enfrenta e retonan cu e situacion di crisis ta trece cune.

Gobernador durante bishita di trabou na Fundacion pa Hende Muhe den Dificultad Segun FHMD, door di e crisis di coronavirus tin un menasa cu violencia domestico lo aumento. Ademas awor e posibilidad ta mas grandi cu e incidentenan ta keda denter di e cas. Hende ta keda cas, ta traha na cas y ademas ta cuida nan yiunan. Den e famianan unda tin violencia domestico, tin varios mucha cu a perde nan refugio, pasobra nan school of e luga unda nan ta keda despues di school tabata nan refugio. Segun FHMD ta dificil pa determina exactamente si e crisis di coronavirus a provoca mas violencia domestico. No ta tur hende ta yama polis. Si e bisiƱanan tampoco meld, hopi incidente ta keda denter di e cas. FHMD ta enfatisa cu e personanan envolvi den violencia domestico por tuma contacto via e number di crisis di FHMD 567 1670  y si tin peligro inmediato, yama 911. Tambe meld si bo ta testigo di violencia domestico of si bo ta sospecha cu e ta tumando luga den bo cercania.

Pa medio di combersacionnan telefonico y, si ta posibel, bishitanan di trabou, Gobernador Boekhoudt ta informa su mes riba e consecuencianan di e brote di coronavirus y ta expresa su apoyo y gradecimento pa e esfuerso di hopi persona den e lucha contra e pandemia. Ta tuma e medidanan den consulta cu e organisacionnan involucra, pa asina e bishitanan di trabou por tuma luga na un manera sigur.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options