Encuentro informativo “Study in Holland”

Oranjestad - Arubahuis conhuntamente cu Departamento di Enseñansa Aruba ta presenta un encuentro informativo pa esnan cu tin interes pa bay studia na Hulanda.

Pais Aruba ta brinda studiantenan cu kier haci un estudio na nivel di Bachelor of Master na Hulanda un prestamo pa financia e estudio: “Arubalening”. Durante e encuentro informativo lo duna informacion amplio di e opcionnan cu Arubalening ta ofrece e studiante, e condicionnan pa por bin na remarca pa un Arubalening y henter e procedura di aplicacion.

Banda di informacion tocante financiamento lo papia tocante seguro, e opcionnan di vivienda pa studiante na Hulanda y e pasonan cu mester tuma pa por haya vivienda. Tambe lo duna informacion di escogencia di estudio y e guia cu Arubahuis ta duna na e studiantenan na Hulanda.

Tur esnan cu tin interes pa bay studia na Hulanda, tur mayor, studiante y publico en general cu kier mas informacion tocante studiamento na Hulanda ta cordialmente invita pa e anochi di informacion aki cu lo tuma luga diaranson 27 di november di 7.00 pa 9.30 di anochi den e Auditorium na Colegio EPI.

Workshops

Banda di e encuentro informativo, Arubahuis conhuntamente cu Departamento di Enseñansa ta organisa un workshop pa esnan cu kier bay studia na Hulanda. E workshop aki lo enfoca riba “studiekeuze” y “huisvesting”.

E workshop lo tuma luga diabierna 29 di november proximo, di 4.00 pa 6.00 di atardi na Biblioteca Nacional na Oranjestad.

Pa por participa na e workshop mester inscribi di antemano pa motibo cu cupo ta limita. Por inscribi door di manda un email na j.vanderlinde@arubahuis.nl cu specificacion di nomber, edad y vooropleiding.

Alumnonan actual di Colegio San Nicolas y Colegio EPI por inscribi pa e workshop cu lo tuma luga na nan scol. Inscripcion pa esaki ta bay via decanaat.

Pa mas informacion por acudi tambe na nos website [ea.aw] y busca Arubalening. Tambe por sigui e desaroyonan a traves di Facebook, Twitter y Instagram @EducationAruba y/of @OnderwijszakenArubahuis.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options