DNM a inventarisa tur e 16 plus areanan pa un decreto nacional bon funda

ORANJESTAD - Departamento di Naturalesa y Medio Ambiente (DNM) ta gradici tur esnan cu tawata envolvi den e proceso pa e 16 areanan haya un nivel di proteccion.

Pal’i Sia (Bursera simaruba)E proteccion ta pa e flora y fauna cu ta habita den e areanan. Durante bastante aña e organisacionnan no-gubernamental a boga pa proteha diferente area na Aruba, manera e area di Spaans Lagoen. A decreta Spaans Lagoen hunto cu Rooi Bringamosa y Rooi Taki como area protegi caba na aña 2017.

Famoso fofoti riba Eagle BeachMayoria di e trabounan preliminar pa pone proteccion di naturalesa riba agenda politico en berdad a wordo haci pa un NGO cu tin interes pa proteha e fauna cu tin su habitat eynan.

DNM, como e departamento encarga cu Aruba su naturalesa y medio ambiente y formalisacion di maneho, tambe a contribui cu realisacion di decreto aki, cu ta encera inventarisacion di mas di 16 area. No solamente pa e avifauna (e parhanan), pero tambe e flora cu ta importante pa e coexistencia y bienestar di e demas flora y fauna presente. Un sistema ecologico cu ta interdependiente; di e manera ey un ecosistema por ta den ekilibrio y por sigui existi.

Mangel Shimaron (Laguncularia Racemosa)Zwartmangel of Mangel Preto (Avicennia germinans)Den mayoria di e areanan aki, tin flora y fauna cu ta protegi caba pa e ley proteccion di flora y fauna local. Awor por bisa cu nan ta haya un di dos capa di proteccion, pasobra e area mes a haya su ley di proteccion awo pa medio di e decreto aki, bou di cual 16 plus area ta protegi. Basa riba e argumentacion den e documento cu DNM a presenta pa fundamenta e ley, ta menciona y numera e areanan concerni.

E 16 areanan den e ley aki ta: 

  1.       California Duinen
  2.      IBA 1 (Important Bird Area) Tierra del Sol
  3.      Saliña Malmok/ Saliña Cerca
  4.      Saliña Palm Beach/ Plas The Mill Resort
  5.      IBA Bubali Plas
  6.      Sero Teishi
  7.      Ramsar gebied: Spaans Lagoen y Mangel Halto
  8.      Rooi Bringamosa
  9.      Rooi Taki
  10.       Rooi Manoonchi
  11.       IBA Rifeilanden Oranjestad
  12.       Areanan di mata di Mangel manera:
  1. Cay, Parkietenbos,
  2. Isla di Oro/Mangel Halto Mangroves,
  3. Commandeursbaai (tur area di mata di mangel)
  1.       Rooi Lamunchi
  2.       Saliña Savaneta
  3.       IBA Rifeilanden San Nicolas te Oostpunt
  4.       Parti cant’i lama na Seroe Colorado, Baby Beach te Boca Grandi

Prikichi - Aratinga Pertinax arubensisAlgun fauna protegi cu DNM a inventarisa den e areanan aki ta:

  • Blenchi Dornasol;
  • Blenchi Esmeralda;
  • Cawama;
  • Falki peregrino;
  • Pega Pega;
  • Prikichi;
  • Raton di anochi;
  • Rogans;
  • Santanero;
  • Shoco;
  • Sternchi chikito;
  • Toteki / Waltaka;
  • Warawara;
  • Yuwana.

Ademas otro organismo manera e calco Strombus gigas. Ta menciona algun, pero tin hopi otro cu ta biba den e areanan. Tambe tin rastro di pupu di coneu, pero no a logra wak of capta nan riba potret durante e inventarisacion.

Mangel Tam  (mangel Rhizophora)Algun flora protegi cu DNM a constata den e areanan aki ta:

  • Banana di Rif;
  • Barbarita;
  • Breba;
  • Breba di pushi;
  • Bushi (macracanthos);
  • Bushi (x bozsingianus);
  • Cadushi;
  • Cushicuri;
  • Fofoti / Mangel blanco;
  • Macubari;
  • Mangel preto;
  • Mangel shimaron;
  • Mangel tam;
  • Pal'i siya blanco;
  • Pal'i siya cora;
  • Tuna;
  • Wayaca macho;
  • Wayaca shimaron.

DNM ta spera cu e informacion aki por duna comunidad un bista di e areanan y e sorto di flora y fauna cu ta protegi pa ley.

Riba e link aki por haya e informacion tocante especienan cu ta protegi tambe. DNM ta haci un yamada na comunidad pa ta mas responsabel ora ta trata cu nos naturalesa y medio ambiente y asina ta mas consciente di nos actonan.

* [1] IBA = Important Bird Area

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options