Digitalisacion di Gobierno ta significa mihor servicio na comunidad

ORANJESTAD – Recientemente Ministerio di Desaroyo Teritorial, Infrastructura y Medio Ambiente a bira e mnisterio piloto unda tur departamento ta conecta y comunica cu otro a traves di e plataforma digital.

Segun e minister encarga, Otmar Oduber digitalisacion no ta un proceso facil si tene na cuenta e custumber di uzo di papel pa hopi aña. E cambio pa e era digital den e aparato gubernamental ta trece cambio pa e personanan cu ta participa den e procesonan di trabou interno aki. E meta ta pa entrante prome di december 2019 por inclui tambe e procesonan externo, loke ta nifica cu pueblo lo no mester entrega peticion den e formato ‘hard copy’mas na departamentonan.

Ad e-governmentE enfoke awor ta riba e procesonan di trabou interno cu ta inclui e departamentonan, fundacionnan, instancianan Sui Generis y e NVnan cu ta resorta bou di Ministerio di Desaroyo Teritorial, Infrastructura y Medio Ambiente (MINROIM). Esaki ta significa cu tur contracto cu mester firma, como tambe acuerdonan y consehonan awor ta tuma luga den forma digital. Esaki ta un adelanto y aumento considerabel den eficiencia, productividad y union/ sincronisacion entre departamento.

Den e trayecto aki, ta importante pa garantisa siguridad di documento door di percura cu tin ‘backup’ necesario di tur documento (lo tin un ‘hard copy’ di cada documento, na un solo departamento).

Un otro factor importante ta cu na tur momento e director y minister por ‘track’ y sa unda e documento ta. A traves di e sistema “Decos Join”, si un persona a ricibi cinco dia pa traha riba e documento unabes cu e cinco dianan aki pasa, lo aparece un bandera oraño cu ta indica cu tin cinco dia mas pa traha riba e documento. Si na di dies dia ainda e documento no a sali, lo aparece un bandera cora. E documento cu e bandera cora lo bay pa e director, unda e director ta tuma e decision si ta duna e persona mas tempo pa traha riba dje of ta sac’e for di man di e persona. Pues directornan tin un sistema cu por controla trabou  mihor y e minister tambe lo tin bista riba cua departamento tin mas tanto documento ‘up to date’ etc.

Cu e sistema aki di maneho di documento digital, eficiencia lo aumenta cu lo resulta den mihor productividad. Den un epoca unda mundialmente e procesonan di trabou ta mas digitalisa, gobierno no por keda atras, y di e forma aki ta optimalisa e servicio na e ciudadano.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options