Dia International di Mangel (Mangrove) - .Mangel Shimaron (Laguncularia racemosa)

ORANJESTAD – Riba 26 di juli ta celebra Dia Internacional pa Conservacion di Sistema Ecologico  di Mangel (mangroves).

Den cuadro di e dia importante aki, Departamento di Naturalesa y Medio Ambiente kier subraya e importancia   nos sorto di mangelnan. E turmo ta na Mangel Shimaron (Laguncularia racemosa).

Blachi y flor di Mangel Shimaron (Laguncularia racemosa)Mundo ta poniendo atencion particular na naturalesa of sea bida riba tera. Aruba tambe ta haci tur esfuerso pa promove un desaroyo cu ta mas sostenibel y duradero, segun e Sustainable Development Goals, specificamente e SDG 15 cu ta concerni Naturalesa/bida riba tera. Cu e meta aki den mente, e conservacion di nos Mangelnan ta un compromiso importante pa nos.

Nos a elabora riba tres otro mangelnan caba cu ta: Mangel Tam (Rhizophora mangle), Zwartmangel (Avicennia germinans) y e  Fofoti (Conocarpus erectus).        E Mangel Shimaron ta e delaster mangel cu DNM ta elabora riba dje e siman aki.

Antes tin hende cu tawata yam’e Mangel Cora, pero esaki por trece confusion como cu na Ingles e Mangel Shimaron ta yama “White Mangrove”.  Pues, ta preferibel pa yam’e Mangel Shimaron pa preveni bruhamento. E mata aki no ta crece mas di 6 meter di haltura y ta saca un flor color blanco di mas o menos 0.5 cm. E ta saca un fruta (no pa come) color berde plat di 1 pa 2 cm largo y 1 cm hancho. E fruta ta crece manera un hala chikito y e simia ta color cora. Ora e simia hecha cu e mata nobo ta crece y sali di e simia (ontkiem), ta yam’e viviparie.

Mangel Shimaron (Laguncularia Racemosa)Mangel Shimaron ta e sorto menos comun cu e otro sortonan. Por reconoce e Mangel Shimaron na e briyo cora cu e tin ora e ta jong. Su blachi ta oval y berde cla. E Mangel Shimaron ta absorba e awa di lama door di su reisnan y ta saca exceso di salo via di conopinan cu ta riba e takinan net bou di e blachinan. Su flornan ta yen di nectar y ta un bon mata di honing.  Na hopi pais ta traha te di su troncon pa uza ora bo tin diarea cu sanger den dje. Na Aruba Mangel Shimaron ta crece den areanan manera Baby Beach, Spaans Lagoen, Mangel Halto y Santo Largo na Savaneta. E cantidad di e Mangelnan Shimaron ta birando menos. 

E informacion treci padilanti pa DNM ta pa informa y conscientisa pueblo ariba nos flora y fauna local. Ta di importancia tambe pa menciona cu tur cuater sorto di mangel ta protegi tambe pa nos ley local, articulo 4, inciso 1 y 2, tambe articulo 26 inciso 1 di e Natuurbeschermingsverordening (AB1995 no2). 

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options