Departamento di Salud Publico ta siguiendo di cerca e desaroyo rond di e casonan di Novel Corona Virus (n-CoV) na China

Oranjestad, Aruba –  Dia 31 di December World Health Organisation (WHO) a haya notificacion tocante e casonan di pulmonia cu tawata aumentando na Wuhan China, di cual e causante a keda identifica como un Novel Corona Virus.

Sintoma CoronavirusE prome caso identifica a liga epidemiologicamente na un seafood market den Wuhan China.

E señalnan comun di e infeccion ta sintomanan di e sistema respiratorio cu ta:

  • Keintura;
  • Tosamento;
  • rosea cortico;
  • y dificultad pa hala rosea.

Den casonan mas severo e infeccion por ocasiona pulmonia, sintoma di e sistema respiratorio grave, problema di riñon y hasta morto. E casonan cu historia di biahe pa Wuhan a keda señala den e otro areanan di China, manera Beijing y Guangdong. Thailandia, Japon y South Korea tambe a raporta casonan. Informacion te na e momentonan aki ta indica un total di 205 caso señala pa laboratorio di 2019 n-CoV y 3 caso registra di morto.

Debi na celebracion di Aña Nobo Chines cu dentro di poco, lo bay tin aumento den biahamento pa China, for di China y den China mes, unda e posibilidad pa aumento den e casonan di transmision ta grandi, pero te cu ainda WHO no a presenta ningun restriccion di biahe pa China.

Departamento di Salud Publico di Aruba ta bezig ta monitor e desaroyonan internacional di cerca relaciona cu e Novel Corona Virus. Basa riba kico e Comitee Internacional di Emergencia dicidi, si ta declara e Novel Corona Virus un emergencia pa salud publico of un preocupacion internacional, DVG di Aruba lo aumenta su vigilancia pa e sintomanan respiratorio especialmente pa e biaheronan procedente di e paisnan unda a raporta e casonan. Departamento di Salud Publico tin un plan pa contene infeccion causa pa un virus respiratorio y lo activa esaki unabes cu señala un posibel caso di Novel Corona Virus na Aruba.

Como Departamento di Salud Publico nos lo keda informa comunidad debidamente riba e desaroyonan rond di e topico aki.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options