Departamento di Salud Publico na Aruba ta atende cu e menasa di coronavirus na un manera responsabel

Dit item is gearchiveerd op 02-04-2020.

ORANJESTAD - For di momento a registra e prome casonan di coronavirus na Wuhan, China a activa e team di expertonan cu ta conseha gobierno pa tuma tur e medidanan di precaucion y cuminsa prepara conforme tur e protocolnan y reglanan internacional.

Aruba mescos cu tur otro pais ta sigui e reglanan di “International Health Regulations” (IHR).
“International Health Regulations” (IHR) cu ancra den un tratado (verdrag). Hulanda como madre patria ta esun cu a firma y ta responsabel pa ehecucion di e tratado aki. Aruba como parti di Reino Hulandes tin e obligacion pa cumpli cu ne, pero Hulanda tin e obligacion pa asisti nos pa nos por cumpli cu ne. Rampenbureau no tin ningun obligacion pa loke ta trata e  International Health Regulations. Esey ta pa Minister di Salud Publico y specificamente Departamento di Salud Publico cu ta apunta un sub-focal point specificamente pa e tarea aki.


No ta prome bes cu departamento di salud ta hay’e confronta cu un brota. Esaki no lo ta ni e prome ni e ultimo biaha y ta pesey eprofesionalnan ta sigui training y educa nan mes pa prepara pa loke ta pasando. Departamento di Salud Publico tin varios plan traha, dependiendo di e modo di transmision di un malesa. Un plan cu por y ta wordo adapta na e momentonan aki pa atende cu novel corona virus (2019-nCoV). Dokternan di cas a haya locual den e mundo di Epidemiologia ta yama un Epi-Info. Esey pa informa e dunadornan di cuido y no solamente e dokternan di cas, di e situacion y kico mester tene cuenta cu ne y otro informacion necesario. Ta importante pa tur stakeholders ta informa riba e tema aki.

Departamento di Salud Publico tin henter un team pa atende cu e tema aki. E team aki a haya training tempo di H1N1 virus y a maneha e brota riba Ocean Dream na aña 2009 y varios otro brotenan na Aruba. Alabes ta haya training y updates continuo di entre otro PAHO con pa maneha cu e brotenan incuyendo esnan respiratorio. Nan ta wordo asisti si mester door di e profesionalnan den e ramo di RIVM, PAHO y CARPHA. Diaramente tin contacto telefonico, via teleconferencia of mail si tin pregunta of update di informacion nobo.
 

Coronavirus COVID-19-virus

Na Departamento di Salud Publico e team ta consisti di 15 persona. Depende e situación,  Hospital y ImSan/Ambulance ta tur e personal cu tin disponibel pa atende cu e casonan.
Hospital y Imsan a prepara nan mes debidamente y na hospital tin kamber apart den sala di emergencia destina pa e casonan sospechoso di Novel Corona Virus y caminda lo tuma muestra pa laboratorio tambe.
Ta importante pa informa comunidad continuamente kico tur a y ta wordo haci. Asina ta importante pa menciona, comunidad por yama e hotline 5922009 of 5930917 of yama dokter di cas si en caso tin e sintomanan di coronavirus cu ta dolor di cabez, keintura halto y problemanan respiratorio. E hotline aki ta disponibel 24/7/365.
Lo swab den garganta of nanishi di personanan cu tin sintomanan y tin personal capacita cu lo haci esaki. Den e caso aki lo opta pa haci esaki den e kamber den sala di emergencia na hospital pa motibo cu tin menos hende exponi y ta desinfecta na un manera apropia e camber cu lo uza. Emuestra ta bay laboratorio di biaha.
 

Aruba ta preparando su mes conforme e reglanan y proceduranan y pa es motibo tin algun opcion pa cuarentena, pero ta depende di cuanto hende. Mester tene na cuenta cu lo trata un caso como un epidemia y asina por hisa e nivel di maneha esaki mas mihor. Den e caso aki lo atende na un manera integral, pues na nivel nacional caminda cu e structura di Rampen lo drenta na vigor por medio di Prome Minister.
Hospital ta dispone di 42 kamber caminda por isola un persona/mucha. Si mester nan tin posibilidad pa amplia esaki.


Obviamente Coronavirus por tin consecuencianan serio pa nos Turismo. Den e structura di Crisis/Rampen na Aruba cu ta consisti di 8 cluster, ATA ta un di e clusternan aki. A informa nan caba mescos cu tur e otro clusternan tin contacto diariamente. ATA ta traha informe cu aprobacion di Departamento di Salud Publico y ta comparti esaki cu ATA su contactonan na Aruba y Internacional.
Ministerio di Turismo, Salud Publico y Deporte ta keda mantene comunidad informa di tur desaroyonan cu tin pa loke ta coronavirus.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options