DEA ta digitalisa material Educativo y ta lansa un portal cu material special pa e sector di enseñansa

Dit item is gearchiveerd op 06-04-2020.

ORANJESTAD - Na 2019 Departamento di Enseñansa Aruba (DEA) a inicia un proyecto di digitalisacion di Material Educativo cu ta destina pa tur directiva di scol, scol y demas actor den enseñansa.

Material educativo digital Departamento di EnseñansaMeta di e proyecto ta pa facilita acceso di material educativo na e scolnan di Aruba como tambe pa stimula uzo di medio digital na scol. Pa por logra esaki a amplia e website www.ea.aw cu un portal nobo special pa material educativo.

E portal ta contene pa un gran parti e edicionnan di Seccion Desaroyo di Curiculo, pero tambe material di referencia desaroya pa Proyecto Idioma den Enseñansa.

Ta trata di e.o. buki di alumno y manual pa docente di e diferente metodonan cu a desaroya pa tur tipo di scol como tambe tur e materialnan di sosten cu ta pertenece na e metodonan, manera buki di lesa, poster, wega, flipcards, material audiovisual (video y cantica), etc.

Acceso na e portal ta exclusivamente pa e sector di enseñansa, caminda cada scol y directiva a haya nan propio cuenta di usuario pa por log in.

Material educativo digital Departamento di EnseñansaSeccion Desaroyo di Curiculo  

Seccion Desaroyo di Curiculo (DEA) ta encarga cu desaroyo y revision di programa di enseñansa y material educativo pa enseñansa na Aruba. A lanta e seccion na aña 1986 cu e meta pa percura pa material cu ta tene cuenta cu e mucha cu ta biba na Aruba. Cu tempo e seccion a crece y (t)a percura tambe pa e metanan nucleo pa enseñansa primario y pa e terminonan final pa enseñansa avansa y profesional den luz di innovacion den enseñansa.

E seccion a desaroya programa y material educativo pa enseñansa basico (Scol Arubano Multilingual), Enseñansa Profesional Intermedio (EPB) y enseñansa secundario general (mavo, havo y vwo).

Material educativo digital Departamento di EnseñansaProyecto Idioma den Enseñansa

Proyecto Idioma den Enseñansa (DEA) ta traha riba standarisacion (fihamento di regla) y cultivacion di Papiamento pa sostene introduccion di Papiamento den enseñansa. Den e cuadro aki (t)a publica material di referencia pa ortografia (buki y spelling checker) y gramatica.

Proyecto Idioma den Enseñansa tambe (t)a guia hopi proyecto di redaccion, produccion y publicacion di buki di lesa (ficcion y no-ficcion) na Papiamento. Gran parti di e publicacionnan aki tambe ta wordo haci accecibel pa medio di e portal.

Intencion ta pa tur publicacion di awor en adelante ta digitalisa y accesibel riba e website, cu lo ta uno dinamico cu espacio pa mehoracion continuo.  

Cu lansamento oficial di e portal ea.aw/materialeducativo ta spera di por duna sosten na e usuarionan, esta tur directiva di scol, scol y demas actor den enseñansa den nan trabou pa progreso di enseñansa na Aruba.

Pa mas informacion por acudi na e website: www.ea.aw/materialeducativo. Tambe por sigui e desaroyonan relaciona cu Enseñansa na Aruba pa medio di Facebook, Twitter y Instagram @educationaruba.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options