Buki di documentacion di nos pilarnan cultural ‘BaluArte’ ta na benta na UNOCA.

ORANJESTAD - E di dos edicion di e buki ‘BaluArte’ ta riba mercado.

Esaki ta un buki den cua a documenta historia di personanan y organisacionnan cu a duna un contribucion significante na desaroyo di cultura den e ultimo 65 añanan na Aruba.

Buki di documentacion di nos pilarnan cultural ‘BaluArte’Documentacion di nos pilarnan cultural

BaluArte ta contene informacion di e entre otro autornan di nos himno di Aruba Sr. Padu Lampe, Rufo Wever y Hubert Booi. Tin varios artista cu ta nos pilarnan cultural cu tambe ta comparti nan historia den e buki y cada articulo ta acompaña pa un cantidad di potret cu ta hiba nos bek den tempo. Tambe e buki ta contene historia di algun organisacion no gubernamental cu tin hopi aña trahando riba tereno di cultura, manera Cas di Cultura, Scol di Musica Rufo Wever y UNOCA.

BaluArte ta na benta

Na juni 2019 a publica e prome edicion di e buki y na januari 2020 a imprimi e di dos edicion cu awor ta na benta na balor di AWG 55,= na oficina di UNOCA situa na Stadionweg 21.

Pa motibo di precaucion actual no ta ricibi placa cash y por cumpra e buki solamente pa medio di un deposito riba cuenta di banco na Aruba Bank # 510470818 na nomber di UNOCA Boekenfonds. Despues por yama oficina di UNOCA 582 0108 of 583 5681 durante orarionan di oficina entre 8’or di mainta y 4’or di atardi. Tambe por manda un email na unoca@setarnet.aw cu e comprobante di pago, pa traha un afspraak pa pasa tuma e buki.

Minister di Finansa, Asunto Economico y Cultura ta informa cu pronto tur participante y colaborador di e documentacion historico ‘BaluArte’ lo ricibi un buki. Tambe tur biblioteca na Aruba lo ricibi un ehemplar di e documentacion historico di nos herencia cultural.

Un bunita regalo

Pa tur amantenan di literatura den Papiamento, coleccionistanan di buki produci na Aruba, personanan y instancianan riba tereno artistico y cultural y especialmente pa e futuro generacion, e documentacion historico aki sigur ta di gran balor. Si bo kier regala un hende un regalo special, algo cu bo por ta sigur cu nan lo aprecia y disfruta di dje, e miho regalo ta e buki ‘BaluArte’.

Gradicimento

Minister Maduro un biaha mas ta gradici tur persona y instancia cu di un of otro forma a coopera pa haci e buki aki un realidad, muy en particular ta gradici sra. Maria Teresa Madariaga kende a duna e buki un toke visual original y unico.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options