Biblioteca Nacional Aruba ta organisa otro edicion di su Festival di Buki

ORANJESTAD – Meta di e Festival di Buki pa Mucha ta pa stimula mucha pa lesa y lanta nan interes pa storia y informacion riba mil y un topico.

E festival ta dura un siman largo y ta tuma lugar na november. Diferente autor di buki y ilustrador ta bishita scol pa stimula mucha pa lesa. Scol, libreria y otro instancia tambe ta parti di e festival. Atardi 3or, di dialuna pa diahuebs (dia 4 di november pa dia 8) tin actividad na biblioteca mes pa tur mucha.

Imagen Festival di buki 2019 Escritornan cu ta parti di e festival ta: Fred Diks, Juliette de Wit. Jeroen Hoogerwerf y Gewout Esselink como ilustrador (Hulanda). For di Corsou biblioteca a invita Tio Ali (Alvin Inecia) y Cathleen Giterson. Di Boneiro ta spera Xiomara Frans-Muller y Denise de Jongh-Rekwest. Pedro Vargas ta bini specialmente for di Colombia. E grupo di Aruba mes ta consisti di e talentonan creativo: Richard Dabian, Olga Buckley, Shaila Vrolijk-Balgobind, Emerita Emerencia y por ultimo Sergio Tjie A Loi. Esaki ta un grupo di profesional riba tereno di conta storia, skirbi storia pa mucha y ilustra.

Den Festival di Buki pa Mucha 2019  e tema ‘Medio di transporte’ (Vervoersmiddelen) ta central. Cu e lema ‘Ban lesa, biaha y gosa’ biblioteca ta invita mucha pa biaha den buki. E destinacion no ta asina importante sino e medio di transporte. Lesando un buki por descubri espacio cu un raket, experiencia aventura riba un barco di crucero, conoce un pais pa medio di un roadtrip, core den tractor y nabega lama riba un catamaran. Un biahe ta enrikece bo bida y lesando un buki por biaha bay  tur parti di mundo.

Lo tin actividad na scolnan participante y na biblioteca na Playa y San Nicolas den prome siman di november. E librerianan participante tambe ta organisa actividadnan den e siman di buki. Apertura di e festival lo ta na Cas di Cultura dia 1 di november.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options