Bayena y dolfijn den awa territorial di Aruba

ORANJESTAD - Mas of menos 20 sorto di bayena y dolfijn ta pasa den awa teritorial di  Aruba y tur ta pertenece na e ordo di Cetacea.

Tin grupo cu por ta presente henter aña y otronan cu ta pasahero den cierto temporada. E bayena y dolfijn ta un mamifero y mescos cu e ser humano, nan ta carga nan yiu den nan bariga y no ta hala rosea bou awa, pesey nan mester superficia varios biaha pa dia pa tuma aire fresco. Nan ta mamífero hopi inteligente y ta comunica mihor bou awa cu tononan di canto halto y skerpi.

Dolfijn den awa teritorial di Aruba. Potret: Aruba Marine Mammal FoundationTa di admira e gruponan di dolfijn cu tin biaha ta scoge pa compaña un boto di placer durante un trip. E ta un momento cu poco sa pasa aden y cualkier persona lo disfruta di dje, semper brindando e respet y trankilidad cu e mamifero nan aki merece. Recien un capitan di un boto a comparti un grabacion riba e medianan social di un grupo di bayena cu nan a logra presencia un atardi na Punta Brabo. Esaki sigur no ta e prome bayenanan cu a wak na Aruba e aña aki.  

Tambe tin biaha nos ta haya cu 1 of mas ta busca refugio y/of un lugar sigur pa recupera di cualkier kebrante di salud. Ta hopi importante pa mantene distancia y duna nan e espacio y trankilidad pa nan por recupera y asina bolbe bek nan rumbo mas pronto posibel.

Desafortunadamente, den casonan extremo, tin cu no ta sobrevivi y e chens ta grandi cu e lo yega tera sin bida. Den tal caso ta conseha pa tuma contacto cu Aruba Marine Mammal Foundation ken por haci mas investigacion y posiblemente saca afor kico por a causa e morto di e mamifero. Tambe nan por identifica esaki. 

Den e Landsbesluit di Bescherming Inheemse Flora & Fauna a scoge pa proteha tur sorto di bayena y dolfijn.  Riba e lista di especie protegi nan ta cay bou di e categoria di Cetacea.

Pa varios aña caba, riba e di tres diadomingo di februari ta celebra World Whale Day. Esaki ta un motibo pa nos corda tene nos beachnan y lama limpi di sushi pa nos tambe contribui na un ambiente sano pa tur bayena y dolfijn cu sa bishita Aruba.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options