Aruba lo celebra #Erasmusdays 2019

ORANJESTAD - Departamento di Relacionnan di Reino y Union Europeo den colaboracion cu Departamento di Enseñansa Aruba, lo organisa pa promer biaha #Erasmusdays na Aruba.

Desde aña 2017, bou iniciativa di e agencia nacional di Francia encarga cu desaroyo y ehecucion di e programa di subsidio di Union Europeo Erasmus+, Europa y mundo ta celebra anualmente e logronan di e proyectonan subsidia cu e fondo aki. E aña aki e celebracion di #Erasmusdays ta tuma lugar oficialmente riba 10,11,12 di october 2019.

Considerando e exito grandi cu subsidio aki a nifica pa Aruba, como  Pais-Teritorio (ultramar) di Union Europeo, ta organisa den cuadro di #Erasmusdays 2019, un evento informativo pa tur e cabesantenan y directivanan di scol. A dicidi di tene e evento aki riba 15 di october 2019, ya cu e tres fechanan menciona anteriormente ta cay denter di e periodo di vacacion di scol na Aruba.

E evento lo tuma lugar den e auditorium di Colegio EPI cu e meta principal di informa nos scolnan riba e oportunidadnan existente pa nan instituto, docente  y alumno .

Ariba diamars 15 di october 2019, lo tuma lugar presentacion di e dos departamentonan menciona y tambe di algun takeholders principal, manera Universidad di Aruba, CEDE Aruba y EPI. E instancianan aki lo splica an experiencia, exito y reto cu por tin den desaroyo di un proyecto y e procedura pa peticion di subsidio.

E evento aki ta registra oficialmente riba e pagina web di celebracion di #Erasmusdays www.erasmusdays.eu di Comision Europeo y ta spera di por crea visibilidad rond mundo door di comparti Aruba su exito.

Logo Erasmusdays 2019Erasmus+

Erasmus+ ta e programa di subsidio di Union Europeo disponibel pa entre otro: institutonan academico, scolnan, organisacion di boluntario, organisacion pa hobennan, como tambe deporte. Bou capa di un proyecto specifico ta crea mobilidad di individuonan entre e paisnan participante, of por financia desaroyo di cooperacionnan strategico entre e institutonan/ organisacionnan pa por ehempel innovacion y reforma di nan maneho. Tambe tin oportunidad pa subsidio pa e desaroyo di maneho specifico di gobierno den sector laboral pa nos hobennan.  E actual ciclo financiero di Union Europeo 2014-2021 tin mas o menos €14.7 miyon disponibel  y esaki lo bay redobla te cu €30 miyon pa e ciclo financiero nobo di 2021-2027.

Ta invita un y tur pa like e pagina di facebook di Europe House Aruba, Erasmus+ Aruba y tambe di e stakeholders menciona pa por sigui e desaroyonan y keda informa tocante e oportunidadnan cu e programa aki ta brinda Aruba.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options