Abattoir ta habri temporalmente

ORANJESTAD – Servicio Veterinario (Veterinaire Dienst) lo habri su servicionan na abattoir temporalmente.

Esaki ta pa alivia e demanda grandi cu tin diparti e cunukero y criadonan di bestia pa cu nos servicionan di abattoir. Servicio Veterinario lo brinda su servicionan di abattoir bou  di condicionan estricto di “social distancing” en conevion cu Corona Virus COVID-19 pa asina no tin aglomeracion di hende. Hendenan cu no sigui e reglanan lo nenga nan permiso pa subi of keda riba tereno di Servicio Veterinario


Ta necesario pa haci afspraak pa e servicionan aki riba e siguiente dianan: 31 di maart y 1, 2, 6, 7, 8 di april 2020.
 

Despues abattoir ta cera pa un periodo indefini.

Servicio Veterinario lo mantene su mes na proximo reglanan pa cu servicio di abattoir:
Cunukero/criador di bestia chikito mester haci un cita prome na e administracion di Servicio Veterinario (tel: 5224310) y mester indica cuanto bestia lo bin cu ne. Si un criador di bestia no tin cita e lo no haya servicio di abattoir.

Riba e dia y ora di su cita, e cunukero/criador di bestia mester presenta su mes na e porta di entrada. Si no a presenta of a yega laat, e cunukero/criador di bestia,  e lo no haya aceso riba e tereno di Servicio Veterinario y lo mester haci un cita nobo.

Na e porta di entrada lo controla si ta cumpli cu e cita (dia, ora y cantidad di bestia. Si tur cos ta bon, lo duna instruccion unda pa hinca e bestianan den e hokinan destina pa esey. Despues di esaki e doño di bestianan mester baha directamente for di e tereno di Servicio Veterinario.

E matansa y keurmento di e bestianan ta tuma luga conforme e reglanan existente.

Despues cu esaki sosode e administracion di Servicio Veterinario lo tuma contacto cu e cunukero/criador di bestia pa pasa busca su bestianan mata. E doño di e bestianan morto mester meld na porta y paga cu placa exacto den e envelop destina pa esaki, e por paga cu ATM tambe.

Servicio Veterinario ta mustra riba e necesidad di mantene e reglanan aki estrictamente, en conexion cu e situacion di Coronavirus y lo no tolera ningun actitud of comportacion cu ta desvia di e reglanan aki.

Nos ta pidi pa colaboracion y compresion pa cu e situacion cu nos ta pasando aden, e siguridad y salud di nos empleadonan y di nos bishitantenan ta central pa nos.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options