Vacuna di influenza pa temporada 2018/2019 ta disponibel na servicio di Malesanan Infeccioso

Dit item is gearchiveerd op 31-12-2018.

ORANJESTAD - Tur aña di nobo entre luna di november pa december ta un custumber cu e grupo di riesgo den nos comunidad ta acudi na Departamento di Salud Publico pa busca nan vacuna contra griep (influenza).

Bou di grupo di riesgo nos ta referi na personanan cu ta na risico pa desaroya complicacionnan grave manera bronkitis y pulmonia pa motibo di griep. E personanan aki ta hende grandi riba 60 aña, mucha bou di 2 aña, personanan cu ta sufri di malesanan cronico of malesa di nan sistema respiratorio. Tambe personanan cu obesidad, na estado y cu ta sufri di un sistema inmunologico abou.

Departamento di Salud Publico kier informa na e grupo di riesgo y comunidad completo cu e vacuna contra influenza ta disponibel na nos servicio di Malesanan Infeccioso pa Afl 20,-. Tur persona cu ta cay bou di e grupo di riesgo por pasa busca nan vacuna completamente gratis cu nan carnet di AZV y un recept di nan docter di cas. Adulto riba 60 aña por presenta cu nan carchi AZV solamente.

Pa mas informacion por tuma contacto cu servicio di Malesanan Infeccioso di Departamento di Salud Publico na 5224200.

Vacuna di influenza