Universidad di Aruba: Data secundario relaciona cu implementacion di Metanan di Desaroyo Sostenibel (SDGs)

Dit item is gearchiveerd op 23-02-2019.

ORANJESTAD - Riba peticion di Comision Nacional di SDG, durante varios luna a haci investigacion tocante e posibilidad pa fortifica e rol di e universidad den coleccion di e asina yama data secundario pa implementacion di e Metanan di Desaroyo Sostenibel na Aruba.

Comision SDG ta encarga cu guia y coordinacion strategico pa implementacion di e 17 metanan di Desaroyo Sostenibel di Nacionnan Uni na Aruba. Hunto e 17 metanan aki ta aspira pa impulsa un desaroyo sostenibel. Data, conocemento y información funda ta hunga un rol importante den esaki. Oficina Central di Estadistica ta colecta, studia y ta warda data estadistico, pero e pregunta ta si tin un rol pa otro instancianan haci investigacion relevante den forma di entre otro raport, scriptie y documento similar, pa implementacion di SDG’s.

Studiantenan Hogeschool WindesheimRiba peticion di e Comision SDG, cinco studiante di e Facultad Financiero y Economico di hogeschool Windesheim a haya e tarea pa haci investigacion riba e topico aki. Basa riba investigacion di fuentenan y ademas no menos cu 23 entrevista cu interesadonan, e team di investigacion a yega na e conclusion cu tin un sosten amplio pa Universidad di Aruba hunga un rol importante den colecta y propaga data secundario. Denter di e cuater facultadnan, docentenan y studiantenan ya a haci investigacion riba hopi tereno y tambe tin e ambicion pa sigui expande e investigacion y haci e resultadonan conoci.

Tambe bou di instancianan gubernamental y sector priva tin un boluntad grandi pa traha hunto. Pero prome mester yega na palabracion con lo duna forma na e colaboracion y con por protega y garantisa privacidad y acceso na data sensibel.

E ekipo di investigacion ta indica cu esnan cu ta traha maneho y e investigadornan mester busca un cooperacion mas estrecho. Denter di Universidad di Aruba mester bin cu un Centro di Investigacion y Data SDG cu entre otro tin como tarea mantene relacion cu gobierno y comunidad y pa pone un base digital accesibel.

Studiantenan envolvi tabata Bas Huisman, Damon Winter, Dilara Erikli, Maurice van Roemburg y Rebecca Segers. E docentenan cu a guia e studiantenan di Universidad di Aruba tabata Bauke Feenstra y Luc Alofs. Jocelyne Croes y Ghislaine Nicolaas a representa comision di SDG como personanan di contacto directo y henter e comision SDG tabata envolví den e investigacion. A entrega e raport final cu recomendacion na e comison SDG y na Universidad di Aruba.