Pronto lo publica vacaturanan pa Bureau Integriteit

Dit item is gearchiveerd op 18-02-2019.

ORANJESTAD - Comision di Integridad hunto cu gobierno ta trahando riba e metanan pa loke ta trata integridad.

Esaki ta e prome paso pa establece e ‘Bureau Integriteit’, cu tin como obhetivo combati e problema serio di integridad den aparato gubernamental. A cuminsa door di encarga sra. Amalin Flanegin pa coordina y lanta e bureau hunto cu personal y e proceduranan corespondiente mas pronto cu ta posibel.

E Bureau Integriteit tin entre otro como tarea:

  • "screen" decisionnan importante di Gobierno;
  • obliga partidonan politico pa medio di ley pa publica un lista for di ken nan a haya   donacionnan grandi y registra e donacionnan cu nan a ricibi.

Ademas lo tin cambio di e ley di destaho publico. E ley cu tin actual ta laga espacio pa hopi interpretacion. Cu cambio di ley lo bira mas cla kico e reglanan ta y con estricto nan lo ta. Manera esaki ta cla lo sigui e pasonan pa ehecuta e otro leynan. Un ley cu tin financiamento riba e presupuesto y ta wardando riba Parlamento pa esaki pasa, ta e ley di e defensor di pueblo, esta e “Ombudsman”.

E reglanan di integridad no lo conta solamente pa e empleadonan publico y e departamentonan di gobierno of pa Gobierno, pero tambe e reglanan di integridad lo conta pa companianan estatal di Gobierno.

E trabounan ta finalisando segun plan y pronto lo publica e vacaturanan pa Bureau Integriteit. Gobierno di Aruba lo traha riba e base legal di e Bureau Integriteit pa asina sigura cu ningun gobierno den futuro purba elimina e Bureau importante aki. 

Prome minister sra. mr. Evelyn Wever-Croes den compania di miembronan di Comision di Integridad