Prome minister ta informa tocante e situacion di Venezuela na Parlamento

Dit item is gearchiveerd op 07-03-2019.

ORANJESTAD – Riba diaranson, 6 di februari 2019 Prome Minister Evelyn Wever-Croes a duna informacion na Parlamento riba e desaroyonan recien na nos pais bisiña Venezuela.

Tambe tabata presente e expertonan riba diferente tereno cu ta atende e tema aki entre otro, Minister di Husticia Andin Bikker, Cuerpo Policial, Kustwacht, Siguridad Nacional, Dimas, Imigracion Aruba, Rampen Bureau, Marina Real y Taskforce Mensenhandel/Mensensmokkel,

Prome Minister a informa cu no tin hpi desaroyo nobo riba e situacion aki. Gobierno di Aruba y tur e autoridadnan concerni ta sigui e situacion na Venezuela di cerca, p’asina nos ta alerta y prepara pa cualkier eventualidad pa proteha nos pais.

Gobierno ta reuni cu autoridadnan local riba e topico aki tur dia, y Prome Minister a indica cu e mes ta atende reunionnan algun biaha pa dia.

Premier Wever-Croes a informa tocante un desaroyo nobo di e siman aki cu ta e anuncio di e posicion di Reino. Den un carta cu  Minister di Relacionnan Exterior Hulandes señor Stef Blok a manda pa Parlamento Hulandes, ta indica cu Hulanda ta reconoce señor Juan Guaido como e Presidente Interino di Venezuela. Esak i ta pa e periodo cu tin mester pa organisa eleccionnan liber na Venezuela. Den e carta aki, Hulanda ta splica su punto di bisti y e posicion di Reino.  Lo mantene e relacion diplomatico cu e regimen di Presidente Nicolas Maduro cu tin e autoridad real, mientras tambe lo cuminsa cera contactonan diplomatico cu Juan Guaido.

Gobierno y tur e expertonan concerni ta sigui e desaroyonan di cerca tur dia y tur e instancianan aki pa hopi tempo caba ta prepara riba e tema aki p’ asina e información ta a base di informacion verídico, Asina por tuma accion riba informacionnan veridico y no riba informacionnan   incorecto.

Aparte di esaki, segun Prome Minister, hunto cu Marina Real, autoridadnan local tanto maritimo como riba tera y cu cooperacion estrecho cu Corsou y Bonairo ta atende  e tema aki debidamente y asina duna informacion tambe.

Prome Minister Evelyn Wever-Croes: “Nos pais bisiña, Venezuela ta pasando momentonan transcedental. Mi ta sinti tambe un preocupacion den comunidad. Y no ta sin motibo si nos mira tur e mensahenan cu ta wordo pasa rond. Mi ta haci un apelacion na tur hende na Aruba pa keda trankil, pa nos no recuri den panico. Pa asina den trankilidad tuma e decisionnan den interes di nos pais Aruba. Aparte di esey loke nos cada un por haci, ta uni den oracion pa Venezuela. Ohala por bin un resolucion pronto”.