Gobierno ta extende e moratorio riba establecimento di supermercado nobo cu dos aña

Dit item is gearchiveerd op 07-03-2019.

ORANJESTAD –Gobierno a informa cu ta extende e moratorio riba establecimento di supermercado cu dos aña.

Actualmente tin un moratorio existente riba supermercado cu ta termina dia 23 di mei 2019. Departamento di Asuntonan Economico a tuma e iniciativa pa haci un estudio uzando diferente metodologianan den e ultimo kwartaal di 2018, pa asina por bin cu un recomendacion pa Gobierno.

Mapa di Aruba cu cantidad di habitante pa districto

Den e resultado di e estudionan haci ta constata cu tin un total di 187 supermercado riba Aruba; esaki ta inclui tambe e mini marketnan den bario. Pa haña un mihor bista a uza Aruba su GIS (Geographical Information System) unda a parti nos Pais den region y zones y a haci un analisis di cuanto supermercado tin den cada region. E regionnan Oranjestad West y Oranjestad Oost cu cada uno 39 supermercado, ta e regionnan cu tin mas tanto supermercado. Region di Noord y Tanki Leendert ta sigui cu un cantidad di 36 supermercado. Den e tabel adhunto por haya un bista di cuanto supermercado tin den cada region.

Departamento di Asuntonan Economico tambe a haciun encuesta atravez di Facebook pa haya sa opinion di ciudadanonan pa sa kico nan ta pensa tocante cu si tin ‘di mas’ of ‘di menos’ supermercado den nan bario. Di un total di 1.800 persona cu a participa, 94% a bisa cu nan kier menos supermercado riba Aruba. Den e encuesta haci, un di e resultado cu a sobresali, 74.5% di e participantenan a indica cu no tin espacio pa mas supermercado den nan bario.

Resultado encuesta supermarkt pa districto Aruba

A base di e resultadonan di e estudionan haci, Departamento di Asunto Economico a recomenda Gobierno pa extende e moratorio riba supermercado cu dos aña mas. Esey ta nifica cu pa e proximo dos añanan lo no duna permiso pa establece supermercado y/of minimarket nobo na Aruba.