Entrega formulario Registro di Personal

Dit item is verlopen op 15-03-2017.

ORANJESTAD – Departamento di Labor (DAO) ta pidi tur negoshi pa entrega nan lista di trabou durante e periodo 15 februari 2017 - 15 di april 2017.

Segun articulo 30 di Ley di Labor 2013 (Arbeidsverordening 2013) e dunado di trabou ta obliga di entrega e registro di personal na Departamento di Labor (DAO).

E registro di personal ta consisti di tres parti:

  • Modelo 1: e personal actual manera registra na december 2016 (ta cuadra cu e lista anterior di personal);
  • Modelo 2: e necesidad pa personal pa 2017
  • Modelo 3: y e necesidad di personal pa cada proyecto specifico (ta cuadra cu e parti tocante proyectonan den e Manpowerplanning).

Adhunto por haya e documento y formulario necesario.

Den caso cu bo tin mas sucursal, DAO ta haci un peticion pa yena un formulario cu tur dato di trahado y pa indica cua trahado ta rouleer na bo sucursalnan (trahado cu ta traha na diferente sucursal), door di pone un circulo rond di e number (prome kolom Nr. riba e formulario).

DAO ta desea pa companianan manda e Registro di Personal 2016 – 2017 den forma digital. Pesey DAO ta haci un peticion pa hinca e datonan den un Excel spreadsheet (segun e modelo di DAO) y manda nos esaki via e e-mail adres: arbeidsmarktonderzoek@gmail.com. Si ta scoge pa e manera aki di entrega e formulario, e ora ey ta pidi bo pa yena e prome pagina (voorblad) di e formulario Modelo 1A, Modelo 1B y Modelo 1C di Registro di personal cu e datonan di bo compania y e datonan di contacto. Por scan e prome pagina y tambe mand’e via e-mail hunto cu bo Excel-sheet. DAO lo manda bo via un e-mail un comprobante cu a ricibi bo formulario di Registro di Personal 2016-2017 y di aprobacion of di desaprobacion. Claro cu tambe ta posibel pa yena e formulario y entrega e hard copy na e balie di DAO.

Pa medio di e PR informacion aki, DAO por tin un bista di e cantidad di personal y negoshinan activo riba mercado laboral. E formulario di registro di personal ta reemplasa e formulario di personeelsopgave y formulario di Manpower di antes. Mester entrega e registro di personal durante periodo 15 februari 2017 - 15 di april 2017.

Si tin mas pregunta tocante e registro di personal por tuma contacto cu Sra. Louisetty Croes na 583-7720 of cu un funcionario di Bureau Arbeidsmarktonderzoek.

Orario di DAO ta di dialuna pa diabierna di 8 or pa 11.45 or y di 1 or pa 4 or di atardi.