E 23.8 miyon euro cu Hulanda a pone disponibel ta bay pa fortifica Aruba pa atende cu e crisis miho posibel

ORANJESTAD - Hulanda recientemente a informa cu lo pone 23.8 miyon Euro disponibel e aña aki pa atende cu e impacto di e crisis di Venezuela riba nos pais.

Prome Minister a enfatisa cu e 23.8 miyon Euro aki, Aruba lo no ricibi como placa. Hulanda ta cuantifica den kico nan ta bay yuda Aruba y Corsou cu e placa disponibel aki. P’esey Gobierno ta trahando riba e lista mas structural di locual mas nos tin mester pa inclui den e lista aki pa Hulanda yuda nos cu ne.

Gobierno di Aruba ta den e proceso pa entrega e lista di loke cu tin mester pa haci Aruba mas sigur. Entre otro mas radar, mas proteccion y vigilancia di nos costanan, mas boto pa controla nos costanan miho, mas asistencia na e procesonan di peticionnan di asilo.

“Entre otro, nos mester mas boto pa Kustwacht, mas hende pa traha y cubri mas ora. Na IND cu ta yuda cu e procesonan di asilo, e cantidad di oranan cu ta wordo poni den e trabou aki, por tambe wordo cubri cu e placa. Necesidadnan di urgencia ora hende bati na porta pa asistencia, tambe por wordo introduci den e lista. Gobierno ta pensando tambe riba e efecto cu e impacto tin riba enseñansa, salubridad (vacuna), husticia (extende capacidad di detencion)”.

Prome Minister a indica cu e lo no parti e 23.8 miyon Euro na mita entre Aruba y Corsou. Tampoco e placa aki lo ta disponibel pa crea vivienda y otro cosnan similar pa e personanan cu ta bin haci peticion di asilo. E placa aki ta bay pa fortifica Aruba como pais den haci Aruba mas sigur p’asina atende cu e crisis miho posibel.

Gobierno ta den deliberacion cu Hulanda pa caba di yena e lista cu diferente rekisito cu a pedi. Esaki ta tumando hopi tempo pero e departamento encarga cu esaki ta haciendo tur esfuerso, trahando hasta den fin di siman p’asina entrega e prome lista na Hulanda.

Pronto un delegacion di Organisacion di Estadonan Americano-OEA (Organization for American States -OAS) lo ta di bishita na Aruba pa un presentacion di e impacto di e crisis di Venezuela. OEA lo tin un sesion plenaria fin di luna na Colombia caminda cu nan lo presenta e impacto di e crisis. Danki na e combersacionnan na mei na Washington di Prome Minister cu e secretario general di OEA, señor Almagro, a inclui tanto Aruba y Corsou den e presentacion aki na Colombia.

“Nos ta mira cu speransa cu esaki lo yuda tambe trece comprension pa e situacion di Aruba y ohala cu por yuda tambe cu fondo. E situacion di Venezuela ta keda un situacion dificil. E impacto riba nos pais ta grandi. Mi no ta mira un resolucion pronto”, Prome Minister a duna di conoce.