Departamento di Salud Publico ta informa riba casonan di sarampi

Dit item is gearchiveerd op 15-02-2019.

ORANJESTAD -  Departamento di Salud Publico di Aruba ta informa dunadornan di cuido y tambe esnan trahando den sector di turismo riba e situacion actual di measles (sarampi) rond mundo. 

Measles ta un malesa prevenibel cu vacunacion, pero cu ta lantando bek den region di America , Mediteraneo Oriental y Europa. Esaki pa motibo di caida den cobertura di vacunacion. PAHO recientemente a emiti un conseho pa islanan di Caribe, incluyendo Aruba, pa ta extra vigilante pa turistanan drentando nos islanan via avion of barco cu sintoma.

Measles ta un malesa serio y sumamente contagioso. E por causa debilitacion of complicación severo y hasta fatal incluyendo encephalitis (infeccion cu por causa hinchamento di e celebro), entre otro diarea severo y dehidratacion, pulmonia, infeccion di horea y perdida di bista permanente. Baby y mucha cu mal nutricion y un sistema inmunologico debil ta vulnerable pa complicacion.

SarampiPa preveni cu measles ta sigui plama den region, PAHO ta urgi tur pais pa mantene nan cobertura di  vacunacion halto. Un cobertura di 95% di vacunacion ta necesario pa preveni brote di measles. Cada mucha mester ricibi dos (2) dosis di e vacuna MMR (measles, mumps y rubella) uno na edad di 12 luna y di dos cu 4 aña. E vacuna aki ta disponibel na tur Wit Gele Kruis y na scol atrabes di servicio Cuido Salud Hubenil si ta necesario.

Cerca cualkier persona cu presenta sintoma di keintura hunto cu tosamento, nanishi cera y infeccion di wowo y tin un historia di biahe pa of for un pais cu tin measles, mester sospecha measles prome cu demas sintoma y rash aparece. Esaki pasobra e persona ta sumamente contagioso e 4 dianan prome cu e sintomanan cuminsa aparece. Mester keda observa un persona asina si e ta desaroya demas sintomanan y si esaki ta e caso mester isola e persona.

PAHO ta recomenda pa monitor di cerca turistanan cu ta presenta sintomanan di measles. Turistanan cu sintoma mester busca cuido medico mesora. Si e turista no por presenta prueba di vacunacion. ofrece nan e vacunacion. Raporta cualkier caso sospechoso di measles na servicio di Malesanan Infeccioso di Departamento di Salud Publico segun Ordenansa National di Malesanan Infeccioso of por tuma contacto cu Malesanan Infeccioso na  5224221/239/241.