Departamento di Salud Publico ta duna cifranan relaciona cu malesanan transmiti pa sangura na 2018

Dit item is gearchiveerd op 28-02-2019.

ORANJESTAD -  Departamento di Salud Publico ta informa cu durante aña 2018 un total di 309 caso sospechoso di malesanan transmiti pa sangura a keda raporta na nos servicio di Malesanan Infeccioso.

Di e 309 casonan sospechoso, 7 a sali positivo pa Dengue, 1 pa Chikungunya y 3 pa Zika excluyendo hende muhe na estado. Si compara cu cifranan di e añanan anterior,  Departamento di Salud Publico ta sumamente satisfecho cu nos a logra keda bou di normanan endemico y esaki sigur ta hopi bon pa salud di nos comunidad y pa e imagen internacional di pais Aruba. E cifranan por ta un  indicacion cu comunidad a bira mas consciente riba e peliger di tin criadero di sangura y e consecuencia nan di esaki.

Bou di e grupo di hende muhenan na estado un total di 757 hende muhe a wordo monitorea/gescreened pa Zika segun protocol di cual 43 nan resultadonan a demostra cu nan a haya Zika den pasado y 12 tawata positivo pa Zika na e momento di e screening.

Apesar cu e cifranan di 2018 ta mustra poco casonan confirma di malesanan transmiti pa sangura, como comunidad nos mester keda cu atencion riba e problematica pa evita cu na cualkier momento cu poco awa yobe nos por haya un aumento atrobe di casonan. Na esnan cu ta colecta awa pa bestia of pa mata, nos ta haci un suplica pa keda trata e awanan aki pa evita cu nan ta bira criadero.

Pa mas informacion por tuma contacto cu servicio di Malesanan Infeccioso di Departamento di Salud Publico na 5224200.

Resumen di malesanan transmiti pa sangura pa districto na 2018