Conseho di biahe di Reino ta keda pa evita di bay Venezuela

ORANJESTAD - E situacion na Venezuela hopi preocupante y tin atencion di Gobierno desde cu e problemanan di nos pais bisiña a cuminsa escala.

 Gobierno di Aruba ta siguiendo e desaroyonan di cerca y ta den estado di alerta pa cualkier eventualidad cu por tuma luga. Prome Minister a duna di conoce varios punto pa cua Aruba ta den estado di alerta.

  • Gobierno na e momentonan aki ta mas alerta y atento riba nos fronteranan.
  • Gobierno ta den estado di alerta riba e impacto internacional y e posicion di Hulanda den e asuntonan aki.
  • E buelonan entre Aruba y Venezuala tambe ta un motibo di preocupacion cu ta pone Gobierno den estado di alerta. Gobierno no kier e situacion na unda mester cera fronteranan y Arubanonan keda pega na Venezuela. Prome Minister a indica cu e conseho di biahe di Reino ta pa no bay Venezuela si no tin nada di haci eynan. Na e momentonan aki, Venezuela no ta un luga pa pasa vakantie. Ainda no tin prohibicion pero e conseho di Reino ta pa evita di bay Venezuela.
  • E di cuartro punto preocupante ta e tema di evacuacion di nos hendenan. Esaki ta algo cu Aruba so no por haci. Esaki ta un plan cu mester haci riba tereno di Reino cu lo tuma su tempo. Pa e motibo aki tambe, desde aña pasa a haci apelacion na tur esnan cu ta biaha pa Venezuela, pa nan registra na embahada Hulandes na Caracas. Especialmente Arubanonan cu ta biba na Venezuela, pa nan registra na e embahada pa si acaso e situacion yega asina leu cu mester evacua, nos hendenan ta riba e lista registra.

Prome Minister a enfatisa cu loke cu ta sosodiendo na Venezuela ta   ponie Aruba den estado di alerta siendo nos un pais hopi cerca di Venezuela.