Cas na Pos Abou 19 destina como monumento proteha

Dit item is gearchiveerd op 24-06-2019.

ORANJESTAD - Segun e ordenansa di Monumento, AB 1991 no GT 46, articulo 4, Minister di Cultura, sra. mr. Xiomara Ruiz-Maduro, a indica por medio di un decreto e cas na Pos Abou 19 como un monumento protegi. 

Cas Pos Abou 19Pa por a prepara descripcion di Pos Abou pa indic’e como monumento protegi mester a studia e edificio bon. A tuma varios siman pa investiga, prepara y documenta pa por describi e edificio monumental. Asina a describi exactamente cada fachada y a pone enfasis riba cada elemento monumental, material, etc. Alabes a studia portretnan bieu, cu ta hopi dificil pa haya, p’asina por tuma nota di e elementonan pa den futuro trece nan bek. Ademas ta nota e elementonan cu no tin balor y tambe esnan cu ta necesario.

Estilo di arkitectura di e cas na Pos Abou 19 ta di un cas di cunucu. E cas ta construi na 1930 door di Mario Rosario Tromp (1 oktober1899 - 1984). Segun su yiu muhenan e cas antes tabata un cas floria, pero despues a kita e simbolonan. Si antes tabata tin simbolo di cas floria riba e murayanan, esaki lo ta traha door di metslanan manera Hilario Christiaans, Donata of Tromp. Tambe antes e cas tabata tin un dak di panchi cu su parti abou paden tabata cera cu pleister di kalki. 

Cas Pos Abou 19Mario Tromp tabata casa cu Johanna Stebana Tromp (2 augustus 1900 - 1963). E pareha a haya 3 yiu homber y seis yiu muhe. E yiu muhe mas hoben ta sra. Faustina Tromp (24 december 1936) cu tabata e ultimo propietario di cas,  prome cu a traspas’e  pa Fundacion di Monumento di Aruba. 

E edificio monumental aki ta cay den categoria A y ta e categoria mas halto cu tin pa edificionnan monumental. E criteria di seleccion pa bira un monumento protegi na Aruba den categoria A of categoria B ta stipula den un di capitulonan di e ‘Monumentenhandboek Aruba’.

Pos Abou 19 lo bira e di 37 edificio registra riba e lista di monumento protegi.